2009年5月30日 星期六

上海婆婆 - 唔會再幫襯咯

今日放工約咗兩父女係市中心既上海婆婆食晏,佢地去到就有位啦,我就幾分鐘後都到埋。呢間野煩呀,限時食飯既,雖然我地一定唔會坐多過一粒鐘,但感覺唔好,d員工好似好趕住同你執埋d碗筷咁,一見是但一個食晒野,即刻收咗你份碗筷,乜佢唔俾食包尾果個食食下話飽,d呀媽會執手尾既咩?


 


我地今日叫咗:


 


小籠包-皮薄煙靭


 


黃金炒飯-油油地,d蝦半透明色,即係十足十雪藏蝦,麻麻(呢碟爸爸唔食得添,事關要揀返d濕碎材料出黎好煩)不過, 大家睇下粒米既比例, 就知呢碟飯有幾大啦.


 


蒸迷你素菜包-爸爸專用 (呢幅放大咗架啦, 個籠邊有咁大吖)


 


婆婆粗炒-即係上海粗炒,有肉絲椰菜同薄到會飛既冬菰絲,略油(爸爸可以食d麵)


 


豆沙窩餅-麻麻


 


呢間野成日都好多人排隊,據我食第二次既經驗,真係見面不如聞名算啦。唔抵食兼食物質素麻麻。唯一係杯茶都夠熱既。


 


食完係商場行逛下,英皇係度擺檔,展出各歌手的登台服飾及歷史圖片獎座及紀念品等。



 


呢幅係2002年既Twins,睇下果陣佢地幾清純。不過,都係呀Sa keep 得好d.



呢個司儀,都幾甜架.不過,我呢個大鄉里都唔知台上唱緊歌既係乜水呀!



印仔四十九 - 我的睡眠小熊 II

大家仲記唔記得我果只睡眠小熊呀?佢係我第六個印仔黎(印仔六 - 我的睡眠小熊),亦都係一個未學行先學走既功課。



可能因為我升班升得快,所以係學習上既體驗都比較「新鮮」,期間遇到既困難同解困既辦法,都記得好清楚。


都玩咗成三個月啦,冇進步就假既,大家都有眼見。我亦都可以好老實咁講,我真係有努力過架!除咗大家眼見既幾十個印仔之外,仲有從未曝光既幾十個添!


鑑於呢個網誌都有好多年輕人同青少年瀏覽,所以我都希望藉此樹立一個好榜樣,以身作則,俾大家體認下我既學習態度,我既成長記錄亦陸陸續續送到大家手上。(我依家梗係得戚啦,因為學有小成啦麻,如果我當年讀書有咁好毅力就好啦!呢d叫「一時唔偷雞做保長」。)


今次,我再重新演譯呢個印仔。既然我已經升上小學啦,梗係要提高難度啦!


印仔既大細縮一半,亦都採用全線條去雕刻。最難得既係.....



我居然記得幫佢加返d「鼻寒」聲呀!


見到其他網友會幫蓋好既圖案上色,咁我呢d小學生就唔好咁快學人上色住啦,但我既印台又只得幾個,黎黎去去都係得果幾隻色,想搞少少新意都比較困難。(可能d初學者都會遇到我呢d相同既問題架)


但轉個頭,又俾我諗到少少好玩野。就係幫熊仔著衫啦!



先將睡衣加上花紋,然後到睡帽。



咦,睡拖都加埋好喎。咕臣就咪啦,太多就畫蛇添足架啦。



依家係咪都幾靚呢?其實,呢個印仔都整好咗成個月架啦,無啦啦又唔知做乜送俾人喎。



送俾邊個架?



係你啦!仲有邊個吖?(都係果句啦: 已經係你既中秋節, 聖誕節, 新年, 農曆年, 情人節, 生日, 兒童節,  端午節, ......禮物黎架啦!)



其實佢都只係我兩只手指咁上下大既唧.


P.S. 如果覺得個名刻得太差, 你就剷走佢啦!


2009年5月29日 星期五

早安!動物農莊 - 重松博昭


初時還以為自己借了本外國農莊生活譯本,怎知是描述一對不識死的日本城市夫婦,貿然到鄉間由零開始,過有機耕種,自給自足生活的小品。


一個退學、一個辭去教席,在深山養蜂、兔、羊、雞;種植各種作物,連建屋的常識也沒有,初時還弄到屋頂四處漏水,山間嚴寒,生活清苦,但男的甘之如飴,女的雖體弱,郤逆來順受,在田間生活數年,孩子陸續出世。晚上丈夫以為自己辛苦了一整天,可以喝杯酒放鬆一下,但做妻子的除了料理家事外,整天都有做不完的工作,一連生產幾個小孩,累得不似人形,做丈夫的仍未為意。


剛經歷一場大火,燒毀一切家當,做太太的又差點因在家產褥感染而死。一家人陸續因感染發病,差點家不成家。尤幸親朋的協助,終於捱過。


務農生活雖苦,但作者寫來輕鬆有趣。妻子入院,命在旦夕的情節,更看得人不想把書放下。我跟自己說:「慳著點看啊,下班那段車程還是要過的呢。」


 


2009年5月27日 星期三

我的第一個名牌袋

我一向都對名牌袋冇乜認知既,對大家耳熟能詳既品牌都係烏下烏下既。如果唔係人地話我整果個俾呀Kate 既Logo印仔係"Kate Spade",我都唔知原來Kate Spade係一個手袋品牌黎架。正一大鄉里呀!



我老闆都知我唔係手袋黨,唔好化粧品,又唔好金銀首飾。可能佢都係睇中我夠樸實,先會三顧茅廬搵我做佢個老秘。佢梗係以為:「今次冇死啦!呢個老秘又唔興煲粥,一定好做得野唧!咦,仲成日都有野食帶返黎喎,正呀!」點知我跟佢之後幾年,賓賓都走埋,冇乜整野食益街坊咯。(整就冇所謂,最怕善後洗碗呀!)



今次,真係可以叫做抱磚引玉啦,竟然收到一個真正「名牌袋」喎!真係靚呀,好想學,好想整。如果我識咗,我果班姨媽姑姐實更加愛我呀!


爸爸的童年回憶之蠶寶寶出世了-Day 2 to Day 7

Day 2 - 阿一明顯地大咗d



Day 3 - 到咗呢日,佢開始成形啦,食野亦食得好咗d



但佢仍然好論盡,食飽咗,爪唔實d葉,成日玩跳樓,拿!擺返個靚post俾大家睇下先,Cheese!



Day 4 又肥咗d啦,睇下佢同牙籤既比例就知啦



爸爸又造咗間別墅俾佢度下假



爸爸覺得阿一比較咀尖,唔多食d咁既粗野



Day 5 - d葉剪到一絲絲咁,佢都唔多願食,仲話呢間度假屋環境差喎!



咁唯有同佢搬啦,呢棵大樹得啦掛?



呢塊葉俾佢食咗一忽架啦



Day 6 - 因為呢棵樹我地仲係度種緊架麻,所以d葉係長久保鮮既,啱晒阿一口胃



食得多咗,d窿自然大啦,一個唔好彩,又玩笨豬跳架啦



食到咁上下,又去後園散下步消化下



呢塊葉都啱咀形,又咀啖先!



爸爸驚佢成日玩跳樓,咪諗住同佢做個安全網咯,點知阿一又唔領情,走鬼咗去



Day 7 - 一星期大啦,駛唔駛擺返幾圍賀下佢呢?



噢!睇下佢大得幾快!梗係啦,佢食靚野大架喎



怕咗你啦,今次用針線,唔用釘書機啦,呢個安全網係今年最新款架啦



爸爸d針線技術麻麻,粗粗地,住住先啦!


2009年5月26日 星期二

Hershey's Special Dark


呢d係上星期買返黎既朱古力,估唔到Hershey’s都學人出d咁款既黑朱古力呀嗄。見佢個盒咁靚,又唔係貴,十二個幾唧,唔整返盒試下,點可以做零食專家呀?



65%黎講,濃郁度都係差少少,我就覺得佢唔夠滑啦。個盒開到盡都只可以退到一半咁上下既唧。



食一粒仔就10卡喎,睇下我d手指就知有幾大粒啦,要減肥既靚女就唔好制啦。


2009年5月25日 星期一

又會咁橋既?

一早就同大肚婆講好咗,有咩風吹草動,老公趕唔切返黎,就call Bibi(事關佢考完筆試,好多時會係屋企),但最緊要咪揀23/5生喎。因為果日早上Bibi要聯校oral practice,下午又要去港台in「太陽計畫2009」麥Sir同學會,又因為爸爸生日,我地夜晚又會出街食飯,原則上冇人係屋企。


B老豆仲好老定咁話:「得吖,呢輪我都係係屯門、元朗返工唧。星期六黎唧,我下晝係度。」


咁好啦,記住咯喎,千奇咪果日出世呀!


明明講好咗架,呢隻百厭牛B居然真係較啱鐘數,擇定吉日搶閘喎!


佢都算醒架啦,係正清晨出世,老豆仲未返工就要趕住同佢地入院啦。


我都係下晝收email先知咋!


真係好啦,母子平安。


爸爸話,同佢同年同月同日兼同時出世既B喎,咁有緣,點可以唔理佢呀?


B,你要乖乖地,好湊d呀。雖然我知你老豆都掂掂地既,但係如果你唔乖,你呀媽就會挪手唔成世架啦。



我手字係咪充滿童真呢? 呢d叫麥嘜體,靚過麥兜果d架!


印仔四十八 - 大雄

有人問:「做咩你唔整叮噹唧?」
叮噹?我麻麻咋喎。
咁點解今次又要整個大雄呢?
冇人要求我整既,就當係賀下呢個新鮮出爐既牛B老豆啦。
Bibi呢個補習老師,我一向叫佢做「大雄」既,因為佢係佛教大雄中學畢業既。真係唔識佢都唔知有間中學叫大雄架。
雕咗成晚,第一稿,發現眼鏡崩咗一忽仔喎,個嘴都係呀,陰功!


咁點呀?咪又改咯,唯有全部線幼d就返晒啦。
越雕越幼,大氣都唔敢抖啖,製成品強差人意啦。



仲整唔整?咪搞!