2012年7月31日 星期二

貓紋身

呢隻貓,原本係紋身圖案既一部份黎。我見佢幾有型,咪諗住雕黎玩下咯。可能真係有愛貓之人,會將佢放係自己身上都未定架!

2012年7月30日 星期一

China's Son - Growing Up in the Cultural Revolution

又睇多一本關於文革既書。



呢本幾好架,一D都唔悶。





作者:陳達,修業於哥倫比亞大學,出身於地主家庭(大家應該想像到, 佢就係當年共產黨眼中既黑五類),自幼跟爺爺學習書法,相當聰明,懂笛子、小提琴等樂器。



因家庭背景關係,幼年時雖學業成績出眾,亦差點被趕出校園。遭受多番欺凌,輾轉跟小流氓為伍,結義金蘭。荒廢學業,成為成績最差的學生。





尤幸毛主席逝世後,四人幫下台。中央政策大變,宣佈全國考試,不論家庭背景,只要成績卓越,一樣可以進大學。陳達重拾書本,急起直追,務求在年半內,將所有課程學回來。雖有壯志,但談何容易?

因父親的關係,作者得到一位大學教授親授英語,成績突飛猛進。又由於中央正渴求英語專才,得以豁免考數學、物理等學科考試。最後以優異成績入讀北京知名學府,畢業後更取得獎學金留學美國,並娶得美人歸。一家四口,在外地樂也悠悠。

他的遭遇可算是異數,萬中無一的幸運兒.

2012年7月27日 星期五

布花花

原本想整貓頭鷹既,但去到呢個網站瀏覽,http://sewlover.com/home/tutorial/stuff_flower.html,我又改變主意啦。

我其實係想做D野放係髮夾上既,咪搵咗D髮夾出黎咯。


呢D布花,我都未整過,要做下實驗先得。我咁C懶,就用硬卡紙剪塊紙樣先(方便要剪布時,一於上布面就可以畫個框啦)。人地標準尺寸係4.5cm x 11cm既,剪布時要斜紋咁剪,如果唔係就唔夠圓喎。

詳細步驟你地自己去返上面個網站睇啦。

懶人就梗係連線都費事畫啦,開頭要先打結,我求其縫一行回針部,等佢變成一個圓筒。


係唔整齊架啦,是但啦,唔覺既!




連線都唔駛剪,係其中一個開口位,縫一行走針。


跟住索緊



變成咁,順便縫幾下,馬實佢再收埋針。


將佢反身,咁D紙口位就藏晒係入面。


另一邊都要先打結,縫一行走針,預備棉花做餡。


塞入適量棉花就索緊佢


索果陣紙口位盡量攝返入去,見唔見? 又係縫多幾針馬實佢。



條線唔駛剪住,兜出外圍,由底插返上面,索實,重複一次,就做出花瓣位的第一條線。我通常會用駁口位做第一條花瓣凹陷位,咁整完出黎就唔多覺個駁口係邊啦。



如此類推,平均地將這個圓波波分成五等份。





要記住,用棉花係唔可以太慳既,我因為之前冇影到呢個工序俾大家睇,所以再做一粒,諗住慳D,俾少D棉花入去,就唔夠飽滿啦。

完成花瓣後,再於上面的中間位置放上裝飾,例如鈕扣、珠片、珠仔、閃石等。


縫好後就在底部收針。這朵花比較大,不適合用於我的髮夾上。怎辦呢?



公司有許多女同事,定必有人會把頭髮紮起。強搶髮圈,就可以繼續做我的實驗。

換上跟髮圈顏色相近的線,把布花縫實。


請同事試戴,很不錯啊!


物歸原主(但就俾我玩到走咗樣),頭髮略少也沒問題,一樣好看。



之前為大家示範的同事,犧牲色相,為我做模特兒,所以再為她做一朵粉藍格的小花,放在她的髮圈上。



你們又喜歡那一款呢?


布料的襯色固然重要,換上不同的花心,就會有不同的效果。這一粒原本是放舊了的布包鈕,我把它染成紅色,又可以重生了。


大家快快動手做,只要動動腦,亦可變出多種變化來。
 

2012年7月26日 星期四

數字油畫



暑假將至,同事紛紛集體訂購數字油畫,供親友的小孩排遣餘暇.

我當然不會錯過機會,順道買幾幅自娛.




我選呢幅黎開始,貪佢比較簡單。一盒包括:顏料、畫架、畫筆及畫布。




上面有晒淺灰色線條及提示數字,跟住數目字既顏色油就得啦。




油親顏色,我習慣由最淺色開始。





晏晝食完飯,仲有四十分鐘剩,快快手開工,油咗咁多。




食晏時間真係要幾忙有幾忙,又要食野,又要吹水,仲要分d時間去玩同上網,真係好快就過,所以第二次作戰,只係油咗件衫仔咋.






再隔多日,又油咗少少。


拎返屋企油埋佢,大功造成!



有一點大家要注意,我懵下懵下,油白時時,諗住圍咗邊先。點知d顏料快乾,回頭已不能將之掃開,所以油得不勻淨。我知D框線係唔均勻,我盡咗力架啦,希望你會喜歡啦。

P.S. 千其咪以為阿乜水鍾意咩公仔,你就走去買幅咁既東東送俾佢慢慢玩呀,要一千擔心機先油得好架。有時呢,愛佢反而害佢,就係咁解啦。

2012年7月25日 星期三

越南新椒



既然俄B聖誕老人無疾而終,咁唯有另謀出路,唔好晒咗D泥吖麻。

今次我試種越南來的佳麗:



痴痴地等,終於都肯啋下我。



都好既,因為佢,我對部電話既拍攝功能亦進步咗。睇下幾清!




過多日,佢就抬起頭啦,睇怕過埋個週末,佢就會整走個莢啦。




點知過咗週末,頂帽仲係度,身邊無啦啦又多咗個小朋友。




真係冇佢符?



努力呀,連呀妹都長到咁高啦,我都見佢有努力過既,下午再睇佢,已經好盡力咁撐開塊葉啦。



點解搞咗咁多日,頂帽都仲係甩唔到呢?




塊葉都開始唔靚,成組葉屈到側晒,隔離位終於忍唔住出手幫佢.



佢話屈得太耐,塊葉就會畸形,都係幫下佢,家陣舒服晒.



原來屈咗幾日,佢真係小兒麻痺呀.




一路兩塊葉都係縐既



仲唔似呀妹咁,曉攤開.



雖然塊葉仲係好縐,但中間既一組葉仔出黎啦。




冇呃你架,換個角度就睇得清楚D啦。
 



可惜佢長得好慢



過咗成個星期先有咁既成績咋。



至於呀妹呢,因為發育得好D,連塊葉都好似大塊D咁。但係,佢天生就有缺憾,見唔見呀?新長出黎既葉係得一塊架咋,唔係兩塊。



又過兩日,阿妹又多塊葉仔啦。

`

由於人地寄養既一梱燈籠椒正在結果,所以真係唔好意思,個風水位借佢地坐一陣,俾多D光線佢地吸收下。過多幾個星期,等佢地既情況穩定D,再俾你地搬返上去。

希望你地生生性性,快高長大啦。